盲公说唱的卜卜脆南乳肉 成广州传统美食

　　阿六讲：南乳花生，广州人简称叫“南乳肉”，因为广州人将花生米叫做“花生肉”。

　　南乳肉最早同鸡公榄一样，属于一种穿街过巷叫卖嘅广州传统零食。新闻中提到，南乳肉系清末广州一个叫“盲公德”嘅盲人所创。可能呢个缘故，之后好多年，卖南乳肉成咗广州盲公专有嘅揾食行业，喺上世纪六七十年代最为鼎盛。

　　以前卖南乳肉嘅盲公“装备”虽然冇卖鸡公榄嘅咁鲜艳夺目，不过，亦系有“标配”：一顶草帽，一个饼干罐（装南乳肉），一支盲公竹。而叫卖声亦有统一嘅叫法：第一声系叫“卜卜脆，南乳肉”，第二声系补充叫“南——乳肉”，再有几下盲公竹喺麻石街上面敲响嘅“笃笃”声“和唱”。咁就组成一首独特嘅南乳肉叫卖“金曲”。

　　上世纪六七十年嘅南乳肉，系用旧书报纸包成一个圆锥形为一包，卖一两毫子，里面嘅南乳肉一般系十几粒。讲到味道，因为以前嘅南乳肉都系盲公当日做好嘅，所以新鲜松脆，比宜家商店摆卖嗰种塑料包装嘅要好食。盲公卖南乳肉到宜家至少消失咗30年，呢个得益于政府各项慈善工作嘅推进，盲公再唔使日晒雨淋咁辛苦揾食，“卜卜脆”只能成为记忆。