白话广州
外地朋友来广州玩，除咗北京路同广州塔之外，仲可以介绍咩地方呢？有小朋友嘅可以推荐去下番禺某个大型游乐场。其实，最早期嘅未有呢啲景点嘅时候，广州人最想去嘅游乐场喺白云区。
呢个地方大家一啲都唔陌生，依家广州好多重要会议都会喺呢度举行，佢就系白云国际会议中心喇。未有呢个会议中心之前，呢度有个好出名嘅游乐场，佢嘅“江湖地位”就同依家嘅香港迪士尼差唔多。大家估到我讲嘅系边度啦？冇错，就系好多人嘅童年回忆——东方乐园。
印象中，东方乐园我只去过三次，每一次记得最清楚嘅就系——条路好远。一次跟住爸爸单位去，一次系小学毕业旅行，最后一次系为咗接待从外地过来玩嘅亲戚。依家去白云国际会议中心，大家会觉得远咩？当然唔会。公交地铁的士，想点去都话咁易。
东方乐园开业嘅时候，曾经有个威水史，一日嘅游客达到10万人。呢个纪录，20年间国内冇一家游乐园可以打破。凡系到假期，呢度必定人山人海。对于春游秋游只系去市内几个公园打个转嘅小朋友来讲，去东方乐园玩系一件“大事”。呢度嘅过山车时时人气爆棚——上去可以睇到飞机起飞降落，嗰个时候真系好开心。
当然啦，东方乐园跟唔上潮流发展，执咗都系必然。而且，广州人从来都唔缺游乐场。
◎李月婷 媒体人
